月份:十月 2014

搵錢的意義

今晚是萬聖夜,係塘人住的城市沒有商家催谷的一連串萬聖節活動,很多人都是回家與家人一齊渡過。鬼佬就係咁家庭大過天,對比亞洲地方,美國假期的時候條街反而變成鬼形都無隻。

塘人的同事當中,如果家中尚有可以逐家逐户問人攞糖的小孩,他們都老早問上司攞定假期或者是提早收工,好讓他們可以早啲返屋企陪小孩一齊外出;因此塘人這類無兒無女又唔想俾人問攞糖的員工就被注定咗要留夜啲。

塘人年幼時經常被父母問:[我哋咁辛苦搵錢嚟做乜?];又係喎,如果覺得搵錢咁辛苦又真係用嚟為乜呢?  同埋搵錢係咪真係要咁辛苦?

到自己真係出嚟落手落腳搵錢後才發現,原來搵錢係唔會覺得辛苦,反而係辛苦咗之後又搵唔到錢個下先至係最辛苦;用富爸爸的理論就係“一隻不斷在籠中走圈的老鼠“,老鼠尚且除咗食之外就會無慾無求,但人類就唔係咁講法啦。

故此塘人搵錢嘅目的係讓自己頭家可以享受更多的地球資源,如果唔係嘅話係為乜呢?  唔通係為咗份工而去搵錢?  咪傻啦!

廣告

屋邨仔

係塘人細過時所一起玩樂過的小朋友當中,出咗兩個在現時香港有返些少名氣的人;其中一個係足球教練,而另一個係兒科醫生。

之所以覺得佢兩位人兄出咗名,原來係因為他們的大名和過往事績都可以係維基百科度搵到;雖然維基呢樣嘢係人人都可以上去寫返幾篇,不過斷估唔會有人咁無聊,自己幫自己寫一篇水蛇春咁長嘅維基吧。

另外他們兩位都上過無線電視,係咩嘢節目塘人就無謂講啦,因為費事俾佢哋見到呢篇文時話塘人誹謗佢哋,要知道出咗名嘅人未必鍾意人哋提返佢哋啲舊嘢。

雖然佢哋兩位都有臉書Account,不過就唔受塘人Add,原先以為佢哋因太耐唔認得塘人所以就各自寫咗篇自我介紹俾佢哋,後來又係見到Seen咗不過無反應,可能佢哋長大成人後怕咗有機會搵佢哋着數嘅舊玩伴,又或者是其他因由。

講返佢哋篇維基文章,簡直可以用隻字不提來講佢哋原本都係一個屋邨仔;更有人離譜到老作自己的家庭背景,而且仲寫到自己嘅人生同目標好似在兒時已經萌芽咁款,搞到由細對到佢哋大嘅塘人都有啲汗顏嘅感覺。

本來童年老友發跡係令塘人非常高興的事,但係見到佢哋又好刻意地隱瞞自己的屋邨出身時又覺得佢哋好自欺欺人。

衆人皆醒,我獨醉

咁快2014年就差唔多快玩完;經過一年的努力,首期到位,每間屋的6個月儲備金到位,按揭也到位。

而家房產,按揭和保險等將士(Agent)就只等塘人睇中邊個單位,一聲令下之後樓3就隨手可得!眼見財務自由之路就快更進一步,心中有點覺得暢快。尤其是自塘人老爸之前已經窮咗好多代(爛賭成性嘅阿爺窮到無錢醫病,就算將只得十二歲的塘人姑媽賣埋都搞唔掂,最後自己搵條繩去了結),呢次仲唔輪到我呢代可以吐氣揚眉?

不過美中不足的是本地就快踏入冬季,所以Moving Season 已過,塘人老婆心急如焚,怕的是搬入樓3後樓2要過一段時間才能租出又或者要割價求租;反而是塘人係呢方面諗都無諗過,可能心中覺得要見步行步。反正一路返住工都會有收入,所以怕佢條毛?

反觀同輩中有很多親朋依然在為佔中與否而籌謀不斷,又或者工餘時特意請假去日本,泰國,台灣等地遊歷,增廣見聞;還有一些會做些上窮苦鄉村做義工的有意義事情。

而塘人兩公婆自己就如市井之輩般一直跟金錢打交道,心中總有股不如人的衝動。

可能這正是衆人皆醒,我獨醉吧。

自私有害嗎?

前幾日戴咗一個客人上車後,就發現前面突然插咗一部Dodge嘅客Van入嚟,搞到我哋坐咗係度想出都出唔到。

坐喺最後面嗰個客睇唔到前面有部Van仔係度,就問我做乜事唔行,我就同佢講前面俾人頂住咗條路。然後我就同佢講:[無嘢嘅,啲人自私啫。]

點知嗰客就勁大反應,話自私係好Bad,仲要Really Really Bad ,搞到我都唔知點回應佢嘅同時又突然醒起佢前妻就係因為自私而抛棄咗因為當百事可樂係水咁飲而在中年就得到腎病嘅佢,呢鑊真係講正啲嘢插中呢條友嘅死穴。

人類嘅自私真係有佢講到咁Bad嗎?  對塘人嚟講自私純綷係每一種生物的天然自我保護機制,目的卻是可以獲取賴以生存嘅資源;所以說一個不自私的生物跟本就不可能在這片弱肉強食的地球上生存。

不過當這件事去到擁有智慧的人類上都變為一件非常麻煩嘅事情;在人類的社會雖然人人也自私,但當會影響到其他人又或者有人想從其他人身上掠奪更多的資源時,佢就會以道德觀來勸教其他人不應該自私。

就像客人的妻子一聽到丈夫有長期病就抛棄他;以生存的角度來說可以說是自然行為,但以人類的道德觀來說她就是十惡不赦。

就是擺明自私的話人就會有罪惡感又或者是其他人不容許,於是有很多人就學會了可以偷偷地自私,只要不被其他人發現就得了。

不過諗深一層,如果人類的自私真的咁有害的話,人類早就好似恐龍般滅絕了,所以說在人類社會中適度的自私也可能是必要的。

而這正是經濟學者亞當在原富論所提及的“上帝之無形手“。

怕咗返工

睇人哋臉書最可怕嘅地方就係會攞人哋好嘅同自己差嘅來作比較;就好似近排經常會見到年近三張的無殻蝸牛同學朋友唔係去旅行就係結婚渡蜜月,仲要去塘人好想好想去嘅日本和台灣,所以就真係愈睇就會愈心傷。

心傷的原因係已經入咗冬天,但係公司請人似乎不能夠達標,所以入冬後所增加的工作量就似乎平均地分配給現存的所有員工,所以都咪話唔慘。就算想請假出埠,一係唔批二就係請唔到連續假。

其實而家去到邊度都會舉哂牌要請人,有時似乎都會有啲公司特意去亞洲度挖人過嚟;所以Downtown嗰度時不時都會見到盲頭烏繩周圍走的黑頭髮。

唔夠人返工嘅後果就係去到邊度都要等,餐廳唔夠侍應搞到食飯要等,就連M記買個包Walmart埋單都要排哂隊。

據說本地失業率是全美排頭三位最低,但係有工無人做嘅後果是好是壞又真係見人見智啦。

弱肉強食

一女子在超市門前的停車場倒車後準備把車檔轉回Drive時突然感覺車尾被撞了一下。

當她下車一望時發現原來對面的男人在沒有望清楚的情況下倒車,並撞向她的車尾。

因為之前沒有被撞經驗,所以女子便不知所措,而且這情緒亦被對方看在眼裏,於是男子便先發制人說:[喂,臭X,你撞到我喎!]

女子被嚇了一嚇後更加不知所措,惶恐地說:[唔係喎,明明係你自己倒後撞落我度。]

男子見到自己得勢,然後說:[妳唔好X走呀!我認實妳!而家我就去搵人嚟!妳企定定係度等我!]

女子這時更加被嚇到鼻哥孔無肉,眼定定到望住自己俾人哋Hit and Run 咁走咗去,最後當然是這名男子再無出現。

由於連對方車牌都記唔住,所以就算想報警都無用,呢單嘢就唯有自己硬食。

所以說人與人之間之間的強弱,當對方強勢時自己就一定會被削弱;不過要知道這個世界上就只有自己能夠保護自己,要欺負人定係要俾人欺負就要靠自己了。

申請LOC被拒

塘人原意為樓1開一條Credit Line,作為樓1任何維修額外支出之用。兼且開一條三萬美金的Line不用任何銀Closing Cost ,利息還可以被扣稅。

開頭網上申請時還很順利,而且即時批核,到第二日銀行還打電話來確認,還提醒我們樓1是投資物業,所以利率會比較高,還讓我們準備好文件交給附近的銀行分行。

到了下午我們食完壽司後就把所有文件交給鄰近的分行,由於我們文件齊全,分行職員跟我們說預計三萬美金的Credit Line 會在明後天出現在銀行的户口。

不過十五分鐘後我們就收到銀行貨款部的另一個電話說她們這間銀行不做非自住物業的Line of Credit ,換句話說我們這次的申請被拒。

可能打電話來的小姐知道自己早上打來的時候沒有跟我們說銀行不做這類貸款,於是就說銀行也會做Cash-Out Refinancing,不過就會有Closing Cost ,這就等於將樓1的低利率按揭(3.875%)換成投資物業利率按揭(>5%),所以塘人就跟她說不用了。

這次申請LOC又再一次證明就算身在其位的銀行職員亦都未必知道自己係做緊啲乜嘢。所以信佢哋超過六成都死人,而且這次被Run過一次信貸資料庫,總覺得被銀行玩了而有啲損失的感覺。